திருவண்ணாமலையில் கொட்டும் மழையையும் பொருட்படுத்தாமல்  லட்சக்கணக்கான பக்தர்கள் கிரிவலம்

Published: Tuesday, October 07 2025, 04:37:41

பௌர்ணமியையொட்டி  திருவண்ணாமலையில் கொட்டும் மழையையும் பொருட்படுத்தாமல்  லட்சக்கணக்கான பக்தர்கள் கிரிவலம் வந்து சாமி தரிசனம் செய்தனர்.நினைக்க முத்தி தரும் திருத்தலமாகவும் பஞ்சபூத தலங்களில் அக்னி தலமாகவும் திகழும்  திருவண்ணாமலையில் மாதந்தோறும் பௌர்ணமி  அன்று  தமிழகம் மட்டுமின்றி அண்டை மாநிலங்களில் இருந்தும் லட்சக்கணக்கான பக்தர்கள் வந்து அண்ணாமலையார் கோவிலின் பின்புறம் உள்ள 14 கிலோமீட்டர் சுற்றளவு உள்ள மலையை அண்ணாமலையாராக பாவித்து கிரிவலம் வருகின்றனர். இந்நிலையில்  புரட்டாசி மாத பௌர்ணமியை முன்னிட்டு  திங்கட்கிழமை இரவு லட்சக்கணக்கான பக்தர்கள்  கிரிவலம் வந்தனர். மேலும் அண்ணாமலையார் கோயிலில் சாமி தரிசனம் செய்ய காலையிலிருந்து சுமார் மூன்று கிலோ மீட்டர் தூரத்திற்கும் மேலாக நீண்ட வரிசையில் பக்தர்கள் காத்திருந்தனர். பக்தர்கள் இரவில் கொட்டும் மழையையும் பொருட்படுத்தாமல்  கிரிவலம் வந்தனர்..இதேபோல் திருவண்ணாமலை தண்டராம்பட்டு கீழ்பெண்ணாத்தூர் செங்கம் சேத்துப்பட்டு கலசபாக்கம் உள்ளிட்ட பல்வேறு பகுதிகளிலும் நேற்று இரவு கன மழை பெய்தது.